Көктем – нәзік мезгіл.

   Көктем – жаңарудың, түлеудің мезгілі. Егер мезгілдердің ішінен бірін таңдап алып, оны сұлулықтың, әдеміліктің, бекзадалықтың символикалық белгісі деп бағалайтын болсақ, ол – көктем! Сазгерлердің әніне, ақындардың жырына арқау болған, суретшілердің сүйрік те жүйрік қаламынан ғаламат пейзаж туғызған әсерлі көктем! Бұл мезгілде айналамен қоса, арулар да құлпыра, жайнай түседі. Қысқы ызғардан қысастық көрген хас сұлулар мен жас сұлулар бар, жалпы адамзат жеңіл киініп, маңдайын торлаған мұңнан арыла бастайды. Оған себепші жасыл мезгілдің нұрлы да шуақты, жайдары күндері...

Иә, айналаны гүлге көмкеретін көктем мезгілі – нәзік мезгіл. Оның нәзік болуының бір себебі сол – қыздармен астасып жатқандығында болар. Қарап отырсаңыз, көктем де кербез, сұлу мезгіл. Нәзік жандылар да тура сондай. Тіпті кейде жылғаларды жағалай аққан сынаптай мөлдір судың сықылық атқан даусынан қыз баланың назды күлкісін, еркелігін аңғарғандай боласың. Қыз бен күздің мұңы бір болса, қыз бен көктемнің шаттығы да, мерекесі де, берекесі де бір сияқты.